كل سنه وانتي طيبة

هذه اللحظة من اللحظات
القليله التي تراوضني بها رغبة حقيقية في الكاتبة والتعبير عن ما بداخلي

اريد ان اوجه رسايل الي
اشخاص غير موجودين في هذه الدنيا

ومن من أريد الكتابة
اليهم

هي .....

أريد ان اقول لها

ياريتك كنتي معايا

كان نفسي اقضي العيد
معاكي

او حتي بس اخرج معاكي
خروجه

واقلك لما تروّحي رنيلي
- زي ماكنا بنعمل -

وتروحي انتي مترنليش
علشان مامتك زعقتلك وانتي اتنكدي ونسيتي - برضه زي ما كان بيحصل -

نفسي ...نفسي بجد ..نفسي
في اللي انتي نفسك فيه

نفسي المس إيديكي

ويمكن

اكتر من كده شوية

كتير كنت بحللم باليوم
اللي نوصل فيه لقمة التواصل الانساني

واللي هيتحقق كله في وقت
قمة التواصل الجسدي

نفسي

ومظنش انه كتير عليه....
ان صوابعي تلمس صوابعك

وألمس شعرك كده زي ما
العازف بيلمس الهارب

نفسي بجد

ونفسي اوي

بس انتي مش موجوده معايا

الله يرحمك ...بس انا
والله ما نسيتك ولا هنساكي وهفضل فاكرك وكل عيد بيعدي عليه

بتمني فيه انيك تكوني
معايا

وبلعن ابو الايام اللي
كانت هتبقي احلي واحلي واحلي بيكي

ممكن تحملوا الاغنية اللي كنت بسمعها قبل
ما اكتب البوست
من هنا

وما الدنيا الا فردة جزمه كبيرة

طبعا كلنا عارفين فوازير الف ليله وليله لكن الجديد ان وزارة التجارة والصناعه قررت عمل فوازير الف جزمه وجزمه وده بعد ما اعلنت الوزارة ان مصر استوردت 65 مليون جوز ولا مؤاخذه جزم من الصين في اخر عشر شهور بس والغريب ان المسؤولين اعتبروا ده شيء يفرحهم ويسعدهم لانه بيدل علي مدي قوة ومتانة العلاقات البتنجانية بينا وبين الصين واكيد اول ما تقرا السطور دي هتقول عليا " يا بن الفشاره " لكن ورحمة خالي حسن لو مش مصدق اقرا عمود ( من الواقع ) في الصفحه الاخيرة بجريدة المساء في عدد يوم الثلاثاء 10 اكتوبر بتاع الاستاذ محمد فوده وطبعا دي جريدة حكومية يعني مش هيكدبوا وصدقوني الموضوع فعلا فزورة كبيرة بلد زي بلدنا اقتصادها متدهور والناس مش لاقيه تاكل طب يبقي مين اللي هيشتري ال 65 مليون جزمة دول من الشعب وبعدين المصيبة اننا استوردناهم في عشر شهور بس طيب لو قلنا كل واحد هيشتري جزمه واحدة يبقي المفروض في 65 مليون مواطن لابسين جزم ( وطبعا ده عند امه يا ادهم ) طيب يبقي الجزم دي جايبنها ليه بس؟ولما بدات اشغل دماغي شوية قلت يمكن جايبنها لنواب مجلس الشعب كسلاح استراتيجي ممكن بستخدموه في حالات الاشتباك في المجلس بس انا افتكرت ان احمد عز متعقد من الموضوع ده وبالتاكيد مش هيسمح بالموضوع ده يحصل في مجلسه ( مجلس الشعب يعني ) تاني تفسير جه في دماغي ان الجزم تكون علشان جمال مبارك ( ما تفهموش غلط ) يعني علي اساس انه لما يمسك الحكم يلبس كل يوم جزمه يدوس بيها علي رقبة مواطن بسيط وبعد كده يرميها بس رجعت وقلت اكيد هو مش بالجراه انه يعمل كده مع انه في الواقع بيدينا بالجزمه مع كل قرار غبي بيقرره في لجنة (الهساسات ) تالت تفكير جه في دماغي ان الرئيس مبارك يكون ناوي يقدمهم تبرع لاعمار لبنان ويبقي صاحب الفضل ان مفيش حد في لبنان هيمشي حافي بس ازاى يعمل كده ونص شعبه بيجيب جزم بالتقسيط المريح والنص تاني بيلبس جزم فردة وفردة طيب بس الجزم دي كلها لمين بس يا ربي اخ افتكرت صحيح دي ممكن تكون علشان وزارة الداخلية علي اساس يستخدمها عساكر الامن المركزي بدل العصيان بعد ما اثبتت الجزمه في الفتره الاخيره نفسها كسلاح ردع ضد المتظاهرين وطبعا علشان بتوع حقوق الانسان ما يتكلموش الجزم جديدة ومفيش حد لية حجة لما يضرب ومش بعيد كمان يكتبوا اسماء المتظاهرين علي الجزم علي اعتبار انك تضرب بجزمتك مش بجزمة حد تاني وبعدين المسثمرين اكيد مش هيبخلوا علي الداخلية ب 1000 ولا 2000 جزمة يعني علشان خاطر يستخدموهم في حفظ امن واستقرار البلد ضد التظاهرين الوحشين بس برده باقي الجزم هتروح فين يا جدعان انا هتجنن حد يرد عليا ؟ المصيبه انهم 65 مليون جوز يعني لو كانوا 65 مليون فردة كنا قلنا معلش لكن جوز ازاي طيب ؟ ومين اللي هيلبس كل الجزم دي وامتي ؟ علي العموم كل اللي اقدر اقوله في النهاية عمار يا مصر يا ارض الجزم وعلي راي المثل وما الدنيا الا فردة جزمة كبيرة ياريت لو حد يعرف ليه الجزم دي كلها يقولي والنبي لاني بصراحة تعبت من التفكير في الموضوع ده . ده الواحد اخره يشتري رباط جزمه وبعد كده يفضل يحوش في تمن الشراب كام شهر عشان يشتريه وعلي ما ييجي يشتريه يكون بقي صغير عليه صحيح وما الدنيا الا فردة جزمه كبيرة .

محمد عيد

عيد ميلاد سعيد ياعيد

النهارده من اول النهار وانا شايف وواخد بالي ان الشمس مطلعتش

قعدت اسئل نفسي واقول ياتري ياواد ياحرنكش ايه السبب ؟؟

المهم

بصيت في النتيجة

لقيت النهاره 14/10

اااااااااااااااااااااااااااااه

علشان كده بأه

اصلي زي النهارده ...من كم سنه كده

اتولدت صديقي وزميل الكفاح التدويني محمد عيد

قلت ياواد ياحرنكش

معلش بأه

اهو يوم ويعدي

وادخل في البتاع بتاعكوا اللي عالنت ده وقول اي كلام وخلاص

قلت ادخل واقله....

كل عيد وانت طيب يامحمد ياعيد

كل عيد وانت طيب ياعيد

بس فين الهديه صحيح

المفروض تجيلبي هديه

مش كده ولا ايه

؟

صديقك في البلوج

محمود صابر ...الشهير بالكونت حرنكش

المعارضة الديجيتال

كلما بحثت عن السبب الحقيقي وراء عزوف الناس البسطاء عن المشاركة في الحياة السياسية والمطالبة بحقوقهم لم اجد سببا قويا يدفع الناس الي الحالة التي هم عليها رغم انني متاكد انه بعد قراءة هذه الكلمات سنجد الكثيرين يسهبوا في سرد الاسباب الحقيقية وراء هذا الموضوع ولكن للاسف دائما يضع السياسي نفسه عند البحث عن الاسباب خارج اطار المشكلة تماما لدرجة انك قد تشعر انة كان مهاجرا وعاد لتوه الي مصر والماساة الحقيقية اننا جميعا نعرف المشكلة ونعرف اسبابها ونعرف ايضا كيفية حلها ولكن للاسف يتصور السواد الاعظم من السياسيين الان ان مهمتهم هي وضع حلول للمشكلة وينسون دورهم الاهم في محاولة تطبيق هذه الحلول بطريقة صحيحة مما يساعد علي سرعة حل المشكلة نهائيا
وعلي سبيل المثال عندما يناقش بعض السياسيين ازمة المعارضة في مصر ووقوفها عند حدود النخبة وعجزها ان تكون معارضه شعبية حقيقيه وبالطبع الاجابات معروفه مسبقا وهي النزول الي الشارع وتبني قضايا المواطن البسيط الخ الخ ... وهنا يقف دور السياسي في ايجاد الحل ولا نعلم من يعتقد انه المسؤول عن تطبيق هذه الحلول , ولاتتخيلوا مدي دهشتي عندما بدات اتامل هذا الكم الهائل من المدونين والمجموعات البريدية والمنتديات والمواقع المهتمة بالقضايا السياسية وايضا العدد الكبير من الافراد المشتركين والمتفاعلين مع هذه الوسائط ومع ذلك مازلنا كما يقولون ( محلك سر ) ولايوجد سبب لذلك غير ان معظم النشطاء السياسين اصبح الانترنت بالنسبة لهم غاية وليست وسيلة لدرجة انهم اصبحوا يحاولون تخيل واقع وهمي ليس له وجود الا في مخيلتهم فقط يحاولون من خلاله تحقيق ما عجزوا عن تحقيقه علي ارض الواقع ويتم ذلك من خلال افتعال ازمة بين طرفين حول قضية ما ويحارب كلا من الطرفين في سبيل اثبات صحة افكاره ونظرياته مع انه في كثير من الاحيان يكون الطرفان علي قدر كبير من الجهل بالمشكلة التي هم بصدد تحليلها ومحاولة حلها وقد تنتهي المناقشة بينهم الي لا شيء لانه لم يكن الهدف الاساسي من وراء اثارة هذه القضية حلها اساسا هذا بالاضافة الي اساليب الحوار السطحية والهشة والمبتزلة في بعض الاحيان والتي قد تنتهي بسباب وشتائم وفي بعض الاحيان بمشاجرة ( والله يمكن الحزب الوطني ما بيعمل كده ) ولذلك قررت ان اطلق لقب المعارضين الديجيتال علي هؤلاء الافراد الذين لانسمع لهم صوتا الا علي صفحات النت والمشكلة الحقيقية من وجهة نظري اننا صرنا نسير في دائرة مغلقه فالمعارضين الديجيتال يطرحون القضايا وهم وحدهم الذين يناقشونها وهم ايضا الذين يضعون حلول لها فلم نسمع مرة مثلا عن احد المعارضين الديجيتال ينزل الي الشارع لكي يعرف فيما يفكر المواطنين البسطاء( بواب العمارة – بتاع اللبن – بتاع البطاطا – بتاع الفول هذا اذا كانوا من الاساس يعيشون في مناطق يوجد فيها بتاع البطاط وبتاع الفول) وهل هم علي دراية تامة بكل ما يحاك ضدهم من قبل النظام ام لا وانا علي استعداد لتحدي كل المعارضين الديجيتال ان ينزلوا الي الشارع ويناقشوا هذه الطبقه من الناس ويجدوا اكثر من 10او 20% يعلمون السبب الحقيقي لما هم فيه من فقر وجوع بل قد تجد رجل فقير ولا يجد ما يكفيه لمواصلة الحياه ويجيبك ( الحمد لله يا بيه كل اللي يجيبه ربنا كويس ربنا ما بينساش حد ومحدش بيموت من الجوع ) بالطبع لااحد من المعارضين الديجيتال يعلم شيء عن هذه الحقيقه المفجعه الموجوده في قلب الشارع المصري وانا حقيقة اعذرهم لانهم مشغولون بقضايا الساعه والتي لايمكن تاجيلها ( اوقفوا هالة سرحان – بيان التيار الناصري في لبنان – لقد كان الرسول (ص) ليبراليا – الماديه الجدليه – موقف السنه من الشيعة ) وانا هنا لااقصد كل من تحدث او طرح هذه الموضوعات ولكني اتحدث عن مناضلين الانترنت فقط والذين اكتفوا يموقعهم بين صفوف المعارضة الديجيتال وللاسف لم نجد رجلا مثل استاذي العزيز د\يحيي القزاز الذي دعا بمبادرة فردية الي اعتصامين من انجح الاعتصامات ( اعتصام القضاة – اعتصام ميدان التحرير الاول ) ولذلك ارجو من كل من ينتظر تحرك الناس حتي يتحرك ان يبدا هو بالحركة حتي يقتدي به غيره وان يحاول مرة ومليون او ان يصمت للابد ويظل كما هو في صفوف المعارضة الديجيتال .