مدام ( ام ترتر )......!!!!!!!!وحشتينا

لحد الان انا مش عارف ايه حكاية مدام ام ترتر وظهرت في حياتنا ازاى لكن مما لاشك فية ان ليها دور كبير في حواراتنا ورغم اننا كتير بنقول في كلامنا " دة عند ام ترتر " واللي ما غيرهاش غير محمد سعد لما قال في فيلم اللي بالي بالك" دة عند امه يا ادهم " لكن محدش فكر يسال نفسة مين هي ام ترتر وعندها دة يبقي فين طب ولية مش ينقول عند ابو ترتر واشمعني الاستاذ ترتر بالذات الغريبة ان السؤال دة لما سالتة لنفسي في لحظة تجلي لقيت نفي ادام حاجات كتيرة بنقولها ومش عارفين اصلها ومش عارفين احنا بنقولها لية او ايه اصلها ؟؟؟!!!! وهل دة عبط مننا وهبل اننا نقول كلام ما نعرفش احنا بنقولة لية ولا يا تري دي سطحية مننا وتفاهة نسال اسالة زي كدة علي العموم انا دماغي من فترة وهي بتهيس ومش عارف بتحدف كدة في حتت غريبة وبتسال اسالة اغرب ومش عارف دة ايه سببه لكن المهم اننا قعدت فترة اتخيل في مدام ام ترتر شكلها ولبسها وياتري ساكنة فين وكمان قعدت اتخيل في الاستاذ ترتر ابنها وهل يا تري هو متعلم ولا بلطجي رومانسي ولا قاهر قلوب العذاري لدرجة اني قعدت فترة وانا بلف في الشارع ادور في وشوش الستات عن ام ترتر او ارمي وداني يمكن اسمع ام ترتر بتنادي علي ابنها ترتر وتقولة " تعالي هنا يا واد يا ترتر يابن الكلب " لكن للاسف تعبي راح علي الفاضي ولم اعثر علي مدام ام ترتر وعالعموم انا نفسي كل واحد يسال عن موضوع مدام ام ترتر واتمني انه يلاقي اجابة ولا يسعنا في النهاية الا ان نقول لمدام ام ترتر وحشتينا بقالي سنين بسمع اسمك ونفسي اشوفك الحكومة من يوم ما اتولدت بنقولنا الديمقراطية دي عند ام ترتر والرئيس بيقولنا هتشوفة غيري عند ام ترتر والمعارضة معندهاش غير سيرتك يا مدام ام ترتر وعلشان كدة انا نفسي اشوفك يمكن اعرف منك ايه اللي بيحصل في البلد ومخلي اجابة كل حاجة عندك انتي بس يا مدام ام ترتر مع اني عارف انه عند ام ترتر اني الاقيكي في يوم من الايام

الصورة رسم تخيلي لمدام ام ترتر وهي في عز شبابها