الوداع يا بلوج سبوت

السادة والسيدات قراء مدونة اى كلام ( او حتي اي حد هيتكعبل فيها وهو علي النت ) نود ان نحيطكم علما ان مدونتنا المصونة هتعزل من بلوج سبوت وستذهب الي مكانها الجديد الكائن في دوت اورج خلاص بقي عدينا المانش وقررنا ان نواصل رحلتنا التدوينية في موقعنا الجديد وسيبقي اسم المدونة كما هو ودة اللينك الجديد تعالوا زورونا
http://aykalaam.org/

شهادة وفاة نظام

قد يختلف الكثيرون حول ما وصل اليه النظام الحاكم من انهيار وضعف فالبعض يعتقد ان النظام يلفظ انفاسةالاخيرة وانه قاب قوسين او ادني من السقوط والبعض الاخر يعتقد ان النظام لايزال يحكم بقبضة من حديد وانه لايزال امامة بعض الوقت لكي يسقط في ظل وجود معارضة غير مؤثرة في الشارع وتعددت الشواهد التي يستشهد بها الجانبين فالبعض يستشهد بانتفاضة عمال غزل المحلة والتي بالفعل استطاع فيها العمال ان يحققوا ما ارادوا وان يحرجوا النظام ويضعوة في مازق حقيقي والبعض الاخر يستشهد بقدرة النظام وقوته في تزوير الانتخابات وفي قمع التظاهرات والسيطرة الامنية الكاملة علي جميع مؤسسات الدولة بداية من المصالح الحكومية وانتهاء بالجامعة , ولكني اعتقد ان النظام قد كتب شهادة وفاته بنفسة فعليا ولعل اكبر دليل علي ذلك هم هؤلاء الشباب الذين يفضلون الذهاب الي اسرائيل او الموت غرقا في البحر علي البقاء في ظل هذا النظام الفاسد الذي جعل من الوطن سجنا كبيرا لابنائه ولك حرية الاختيار ام ان تبقي سجينا او تبقي سجاناولا اعلم في الحقيقة حتي الان بلدا مثل بلدنا يسافر ابنائها بطريقة غير شرعية الي اوربا ويدفعون ما يقرب من 30000 لكي يهاجروا علي ظهر مركب لا يقوي علي السير حتي في الترع وهم يعلمون ذلك جيدا وليس هذا فقط ما يدعو للغرابة ولكن المدهش والمبكي في نفس الوقت ان يقوم هؤلاء الشباب بتمزيق جوازات السفر المصرية ومحو كل ما يثبت هويتهم كمصريين بل ان الامر قد وصل الي خلع الملابس الداخلية والتي بطبع مكتوب عليها صنع في مصر حتي لا يتعرف عليهم رجال الشرطة ويقومون بترحيلهم الي مصر مرة اخري الي هذا الحد وصل الامر بشباب هذا البلد والذي كفر بوطنه وبقدرته علي العيش علي ارضه بل ومستعد ان يضحي بحياته في سبيل الهروب من هذا السجن الكبير وفي الحقيقة ان الامر برمته يبدو وكانه فيلم تراجيدي او مسرحية هزلية البطل فيها هو ذلك النظام الذي فقد وعيه وادراكه ووضع نفسه في مكانة الالهة والتي هي بالطبع مهما حدث لم ولن تخطيء ولن تموت ولن تنتهي مهما حدث فهي خالدة خلود الاهرامات وابوالهول ولكنهم في الحقيقة قد ماتوا بالفعل فليس الموتي هم من غرقوا في عبارة السلام 98 او في قوارب الهجرة الي ايطاليا ولكن الموتي الحقيقيون هم من ماتت ضمائرهم وحولوا هذا الوطن الي سجن كبير البعض يبحث سبل الهروب منه

الملك فاروق جاني ام مجني عليه ؟؟؟؟

السؤال دة بقي بيطرح نفسة بقوة في الفترة الاخيرة وخصوصا بعد اذاعة مسلسل الملك فاروق لانه بجد المسلسل بالرغم من انه كان بيذاع علي قناة فضائية لكن حقق نسبة مشاهدة كبيرة وعمل تاثير كبير في الشارع المصري والمسلسل بيخليني اطرح تساؤل حول الفترة التاريخية اللي كان موجود فيها الملك فاروق وهل فعلا الفترة دي كان فيها ديمقراطية وسياسة بجد ولا كانت العهد الغابر زي ما قالوا بعد الثورة وفي الحقيقة ان المسلسل وضع ناس كتير امام مقارنة ما بين مصر الملكية ومصر الجمهورية وفي الحقيقة انا شايف انها مقارنة مش موضوعية لان في عهد عبدالناصر شطبوا التاريخ اللي قبلهم بجرة قلم وقرروا انهم يبداوا التاريخ من حيث بداوا وعلشان كدة احنا مفيش تحت ايدنا حاجة نقدر نحكم بيها علي الملك فاروق لان حتي الاعمال السينمائية اللي اتعملت قبل كدة كانت بتجيب الملك اللي لابس نضارة سودا وكرشة مترين وبتاع نسوان وبردة لم يقدموا حاجة واضحة وواقعية سواء عن ايجابياته او سلبياته والغريب ان حتي عهد عبدالناصر فيه حاجات كتيرة لسة ما نعرفش عنها حاجة وتبدو غامضة لدرجة ان حتي الظباط الاحرار نفسهم اختلفوا حول التأريخ للفترة دي وعلشان كدة انا شايف ان الملك فاروق مكنشي شيطان زي ما هما كانوا بيقولوا وعبد الناصر بردة مكنشي ملاك زي ما بيدعوا وعلشان كدة انا اعتقد اننا في حاجة ماسة لاعادة قراءة التاريخ لان مشكلة كل تجربة انه مابيحصلشي نقد ذاتي من اصحابها ليه ودى اكبر مصيبة وعلشان كدة لما تشوف اليساريين النهاردة تحس انهم زي ما هما من السبعينات حتي القهاوي اللي بيقعدوا عليها ما اتغيرتش نفس الاسلوب نفس الفكر نفس الاخطاء ودة مش لليسار بس دة بردة لكل التيارات التانية وعلشان كدة احنا لسة واقفين مكانا وما اتحركناش ولا خطوة واحدة للامام , انا بجد حبيت مسلسل الملك فاروق جدا كعمل فني محترم واتمني انه ييجي اليوم اللي فعلا نبقي قادرين نعرف تاريخ بلدنا الحقيقي بعيدا عن عبث الحكام

رمضان كريم

كل سنة وانتم طيبين ويارب بقي الناس تصوم وما تعملش زي كل السنة رمضان بالنسبة لي السنة دي متغير شوية لان دى اول مرة اقضي رمضان بعد تخرجي من الجامعة عقبالكم كلكم وانتظروا بوست رمضاني قريبا

مهرجان القلعة للموسيقي والغناء

بدا مهرجان القلعة للموسيقى والغناء اليوم بالقاهرة

تبدأ مساء السبت بمسرح سارية الجبل بقلعة صلاح الدين فعاليات الدورة الرابعة عشرة لمهرجان القلعة للموسيقى والغناء الذي تقيمه دار الاوبرا المصرية في الفترة من العاشر من اغسطس وحتى الحادي والعشرين من الشهر.

يقدم المهرجان هذا العام 58 حفلا مجانيا بالقلعة اضافة الى 11 حفلا بأسعار رمزية على المسرح المكشوف بدار الاوبرا المصرية.

وقد دعت دار الاوبرا مجموعة من الفنانين العرب للمشاركة في الحفلات من بينهم عازف الجيتار العراقي الهام المدفعي وعازف العود العراقي نصير شمة وعازف البزق السوري يعرب جميل والعازفة الفلسطينية عبير منصور.

كما يشارك في المهرجان مجموعة من الموسيقيين المصريين بينهم هاني شنودة وعطية شرارة ويحيى غنام وفتحي سلامة ومجدي الحسيني الى جانب المطربين الشبان كرم مراد واحمد الطويلة ووائل سامي ومطرب فرقة الموسيقى العربية محسن فاروق.

يكرم المهرجان ستة فنانين من فناني دار الاوبرا هم مخرج عروض الباليه والاوبرا عبد المنعم كامل والمطربة ايمان مصطفى وعازفة الة الماريمبا نسمة عبد العزيز وعازف الة التشيلو زين الأشقر والعازفة عواطف الشرقاوي ومهندس الديكور عبد الله العويطي.

والدعوة مجانية للجميع اتمنى ان تستمتعوا باوقاتكم

كل سنة واحنا مدونين يا حرنكش

علي فكرة يا جماعة النهاردة 30/7/2007 يبقي عدي علينا سنة بالتمام والكمال عليا انا والواد حرنكش كمدونين وعلي فكرة انا وحرنكش اصدقاءجامدين جدا وانشاء الله كل سنة علاقتنا تبقي اقوي و احسن من السنة اللي قبلهامع مرور سنة علي مدونتنا الحمد لله دلوقتي انا اتخرجت وبقيت مهندس وحرنكش حقق جزء من احلامه في مجال السينما واخرج اولي افلامه الديجيتال وبالرغم من اني في فترة من الفترات كنت محبط من موضوع التدوين الااني بالفعل بقي ليا ذكريات جميلة مع التدوين والمدونين زي الواد محمد عادل ( ميت ) ومحمد الطاهر ( مواطن مصري واخد علي قفاه ) عمر الهادي ( اسد )واحمد بدوي ( بدوي الرابع عشر )ورامي ( أيوب ) وجيمي هوود ومحمد فؤاد وتويو وكمان كايند جرل اللي علي طول بستني تعليقاتها علي المواضيع اللي بكتبها ومكسوفة هانم طبعا اللي كانت علي طول بتعلق علي بوستاتي علي انها بتاعة حرنكش وكمان نادين ( ساتيا جراها ) اللي بعتبرها اختي الصغيرة وربنا يوفقها وتنجح ودلوقتي بقي اسيبكم مع اول بوست كتبناه في المدونة وكان حرنكش اللي كاتبة بجد وانا بكتب البوست دة حاسس اننا زي ما نكون فعلا لسة عاملين المدونة دلوقتي ويارب السنة الجاية تكون سنة سعيدة علي المدونين كلهم

" أخيرا بقينا مدونين "


ياااااه
واللهي ماعارف اقول اايه
الموضوع كان ضحك وهزار وتهييس
انا كنت قاعد مره في نقابة الصحفيين
وروحت قايل كلمه كده مش عارف ايه اللي خلاني اقولها
قولت لاتنين اصحابي ايه رايكم ..ماتيجو نعمل مدونه
عادي يقي
لقيتهم بيقولو قشطه وبييس ..ومعاك في الحوار
خلاص ياجدعان كلام رجاله
اه كلام رجاله ياحرنكش
طيب انا هكريت النهارده ..وأبعتلكو النفيتيشن
الكلام ده حصل من حوالي شهر خمستاشر يوم ..مش فاكر
لاني من بعد ماكريت وبعت الانفيتيشن ...محدش عبرني من اللي كانو معليين حسهم اوي وهمه بيقولو كلام رجاله
لكن النهارده 30/7/2006
حصلت المعجزة الكبري
ولقيت رساله عالميل بتقولي ان فيه واحد من الاتنين قبل النفيتيشن
لولولولولولولولولوي
عقبال عندكو ياعيال
وبدخل عالبتاع لقيته كمان عامل بوست
عقبال التاني يارب
عارفين كمان اللي عمل البوست كنت عمال اقوله مين اللي هيعملنا الديزين
يقولي عيب عليك
اقوله يعني انته
يقولي ياراجل هتجيب ديزينر وانا موجود
وطبعا زي ماحضراتكو شايفين
الديزاين اللي عاملينه متميز جدا
ومن رابع البتنجالات انك تلاقيه عند اي مدون
ماشي ياجدعان
منجلكوش في مدونه واقعه

عملوووووووووووووووووووووووها الوحوش

اخيرا وبعد عذاب وصراع مع التعليم العالي ( قال عالي قال ؟؟!!) لستة
اعوام من الكفاح والنضال المتواصل استطعنا بتوفيق من الله وبدعوات السبعين
مليون مصري ان نجتاز هذه المرحلة الخطيرة من عمر الوطن ونبدا صفحة جديدة
من صفحات الكفاح والنضال في ساحة اخري

من الاخر يعني انا عايز اقولكم اني نجحت وبقيت مهندس اد الدنيا واخدلي
بالك ؟؟؟ ايوة انت يللي بتبص هناك الكلام ليك انت هتستهبل ولا ايه ؟؟؟
وياريت بقي كل واحد يخلي عنده دم ويقولي بعد كدة يا بشمهندس هو اينعم
احنا البساط بينا احمدي لكن بردة لا يصح الا الصحيح وبعدين يا جماعة دة لقب
بعد جهد وصراع وكفاح ممكن اكتبلكم فيه كتب ومجلدات وعقبال يارب الباقيين
وفي النهاية نداء الي كل شاب وكل فتاة لو كنت علمي رياضة والتنسيق دخلك كلية هندسة لازم علي طول وفي الحال تحول الي كلية البوسطة جامعة طنطا لانها بالتاكيد ليها مستقبل اكتر من الهندسة
وفي النهاية بحب اوجه الشكر لعم شحاتة الساعي اللي كان بيجيبلي النتيجة كل سنة وعم عبد العزيز اللي كان بيعطل الدكاترة علشان نمشي بسرعة وما نقعدش المحاضرة كلها وعلي فكرة انا بعتبر الاتنين دول الابطال الحقيقيين في الكلية