سر الارض

حاولت ان اتجنب متابعة ما يحدث في فلسطين ولبنان وعشان كدة قررت مقاطعة قناة الجزيرة ومتابعة التليفزيون المصري لكن برده مفيش فايدة (اللة يحرقهم ) مش عايزين يسيبوني في حالي لكن خير اللهم اجعله خير لقيت الريس البركة طالع علينا زى العفريت اللي طالع من القمقم هو وصاحبة الانتيخ الملك عبد الله الحمار بتاع الاردن وفي مؤتمر صحفي بهيج (محدش يفهمني غلط ) أكد سيادة الطرطور وجلالة الطنبور أن اللي بيحصل في فلسطين ولبنان بسبب حزب اللة وسياساتة بنت الأحبة اللي بتخلية يجيب ورا ادام ايران وحماس وسوريا وبما انهم تجرؤا وخطفوا اتنين اسرائيليين خلاص بقي يلبسوا وذنبهم علي جنبهم ومحدش هيساعدهم من الحكومات العربية لانهم بالبلدي خلاص لبسوا في العمود يستاهلوا عشان يحرموا يسوقوا الهبل في الجبل ويهاجموا اسرائيل تاني ويبقوا يخلوا ايران تنفعهم وده كان ملخص المؤتمر الصحفي اللي عملوا سيادتة وجلالتة وبعدهم علي طول طلع علينا أحد رعاة الغنم من السعودية عشان يفقعنا بنفس الكلام ويبدو انة متاثر جدا بافلام الكارتون(space tone ) لانة كل شوية يقول مغامرات مغامرات مش عارف بصراحة اية موضوع المغامرات ده أما الرئيس بشار الجبار اللي ما يتهدلة دار او يموت لة حمار( مصدر العبيطة علي الآخر) ورغم ان صوت الانفجارات والنعمه هيخرم ودانه لكن يبدو انه في نزهة في الغابة بيفسح الاسد او بيحمي الفيل او بيجري ورا النعام او بيلعب مع كلب البحر ماتعرفشي بالظبط علي العموم ربنا معاه برده اصلة خلف الحبايب لكن بصراحة الراجل لما عرف قال احسن خليهم يتعلموا الادب ويعرفوا ان اللة حق يعني كان الجيش بتاعنا بيحمي النسوان بتاعتهم وهما نايمين علي بطنهم بيتشمسوا علي الشواطيء وفي الاخر طردونا يوروني هيدافعوا عن نفسهم ازاي أما الاخ معمر القذافي فدة حكايتة حكاية صدقوني يا جدعان الراجل ده بيحب فلسطين ولبنان المشكلة ومافيها ان الشعب الليبي لسة ظايط عشان فوز ايطاليا بكاس العالم والراجل مش عايز يعكنن علي شعبة باخبار وحشة تبوظ فرحته شوفوا الراجل اد اية بيخاف علي شعبة ومش عايز حتي يزعلة وشوفوا اد اية الشعب الليبي وفي للناس اللي احتلوه في يوم من الايام وطلعوا عين اهلة واللة يا جدعان الدمعه هتفر من عيني تخيلوا انهم مستعدين يخسروا من ايطاليا في الكرة ولا انهم يخسروا من أي منتخب ابن كلب عربي وده لان العشرة ماتهنشي الا علي ولاد الحرام والليبيين ولاد حلال مصفي طيب يا جماعة والنبي الرؤساء دول يعملوا اية اكتر من كدة يعني يروحوا يحاربوا بنفسهم عشان شعوبهم المتخلفة تستريح وتهمد ( اللة يكون في عونهم ) لكن الغريب ان معظم الرؤساء العرب ما يعرفوش حاجة عن اللي بيحصل في لبنان وفلسطين ولما حاولت اعرف السبب عرفت ان الرؤساء المخلصين لشعوبهم بيتفرجوا علي تسجيلات مباريات كاس العالم اللي فات بعد ما قرروا انهم مش هيشوفوا المباريات زيهم زي باقي الشعب وهيتفرجوا علي التسجيلات بعد ما كاس العالم ينتهي علي العموم انا في الاخر لقيت ان احسن حل هو اني اتفرج علي حاجة واحدة بس وهو برنامج سر الارض .

وصبح صبح يا عم الحاج

مرسي بهيج